Mannauðsstefna
Mannauðsstefna þessi gildir um Langasjó ehf. („Langisjór“) og dótturfélög þess (Ölmu íbúðafélag hf., Freyju ehf., Mata hf., Matfugl ehf., Salathúsið ehf., Síld og fisk ehf. og Verkgarða ehf.).
Markmið Langasjávar er að laða að, þróa og halda í hæfileikaríkt starfsfólk. Enn fremur að skapa jákvætt og fjölbreytt starfsumhverfi. Við leggjum áherslu á jafnrétti og jöfn tækifæri fyrir allt starfsfólk okkar og berum virðingu fyrir fjölmenningu sem ríkir innan samstæðunnar.
1. Jafnrétti
Langisjór tryggir að allar ákvarðanir sem varða mannauðsmál séu teknar með jafnréttissjónarmið að leiðarljósi.
Jafnlaunastefna: Gagnsæjar launaákvarðanir og jafnræði við launagreiðslur, í samræmi við lög nr. 86/2018 um jafna meðferð á vinnumarkaði.
Jafnréttisáætlun: Reglubundnar úttektir og greiningar á launamun og stöðu jafnréttismála innan samstæðunnar.
2. Starfsánægja
Starfsánægja er lykilþáttur í góðu vinnuumhverfi. Ánægt starfsfólk skilar betri frammistöðu, eykur samvinnu og stuðlar að jákvæðri vinnumenningu.
Reglubundnar mælingar eru framkvæmdar þar sem kannað er hvernig starfsfólki líður á vinnustaðnum.
Markmið okkar er að skapa umhverfi þar sem öllum líður vel og geta verið þeir sjálfir.
3. Ráðningar
Markmið Langasjávar og dótturfélaga er að laða að og ráða hæfileikaríka einstaklinga með faglegum hætti.
Jafnréttisráðningar: Öllum umsækjendum er tryggt jafnræði í ráðningarferlinu óháð kyni, aldri, uppruna og kynhneigð.
Gagnsæ viðtalsferli: Við tryggjum sanngjarna og vel rökstudda ákvörðun við val á umsækjendum.
Starfslýsingar: Liggja fyrir áður en störf eru auglýst og gefa rétta mynd af ábyrgð og kröfum til starfsins.
4. Starfsþróun og Fræðsla
Starfsþróun og símenntun eru mikilvægir þættir til að auka faglega þekkingu og hæfni starfsfólks. Stjórnendur leggja áherslu á að starfsfólk fái tækifæri til að vaxa og dafna í starfi.
Langisjór og dótturfélög bjóða starfsfólki tækifæri til símenntunar og starfsþróunar.
Stjórnendur hvetja starfsfólk til að taka ábyrgð á eigin þekkingu og sýna frumkvæði í að leita sér nýrrar þekkingar.
Reglubundin þjálfun og fræðsla fer fram fyrir allt starfsfólk.
Starfsþjálfun og aðlögun nýrra starfsmanna
Fyrstu kynni nýs starfsfólks skiptir miklu máli, og því er vönduð starfsþjálfun tryggð til að stuðla að góðri aðlögun og jákvæðri upplifun.
5. Menning
Langisjór vinnur náið með starfsfólki til að skapa jákvæða fyrirtækjamenningu þar sem öll fá jöfn tækifæri til að vaxa og dafna. Fyrirtækjamenning Langasjávar og dótturfélaga byggist á samvinnu, fjölbreytni og sköpun:
Fjölmenning: Við erum staðráðin í að skapa vinnuumhverfi þar sem allir starfsmenn geta notið sín.
Upplýsingaflæði og traust: Heilbrigð samskipti og samvinna milli starfsfólks og stjórnenda eru lykilatriði til að byggja upp góðan starfsanda.
Viðburðir utan vinnutíma: Til að styrkja tengsl og samstarf milli starfsmanna, bjóðum við upp á ýmsa viðburði skipulagða af félögum samstæðunnar eða starfsmannafélögum þeirra.